თაიმლაინი

სექტემბერი, 2018 (1 ღონისძიება)

ქართველი მოთხილამურეები შვეიცარიაში გაემგზავრნენ

დღეს საქართველოს სამთო-მოთხილამურეთა ნაკრების წევრები: ალექსი ბენიაიძე, სოსო ჯაფარიძე, ბესარიონ ჯაფარიძე, სანდრო ჟორჟოლიანი და მწვრთნელი ვახტანგ თედიაშვილი შვეიცარიაში გაემგზავრნენ.

შვეიცარიის ცნობილ მყინვარ - სასფეში ისინი ორი კვირის განმავლობაში  თავიანთი მწვრთნელის - ვალტერ ჰუბმანის მეთვალყურეობის ქვეშ ივარჯიშებენ.

ჩვენს სპორტსმენებს წარმატებულ ვარჯიშს ვუსურვებთ!

 

სრულად 10 სექ
ივლისი, 2018 (1 ღონისძიება)

ქართველი მოთხილამურეები შვეიცარიაში გაემგზავრნენ

დღეს საქართველოს სამთო-მოთხილამურეთა ნაკრების წევრები: იასონ აბრამაშვილი, ალექსი ბენიაიძე, სოსო ჯაფარიძე, ბესარიონ ჯაფარიძე და მწვრთნელი ვახტანგ თედიაშვილი შვეიცარიაში გაემგზავრნენ.

შვეიცარიის ცნობილ მყინვარ - სასფეში ისინი ათი დღის განმავლობაში  თავიანთი მწვრთნელის - ვალტერ ჰუბმანის მეთვალყურეობის ქვეშ ივარჯიშებენ.

ჩვენს სპორტსმენებს წარმატებულ ვარჯიშს ვუსურვებთ!

 

სრულად 19 ივლ
ივნისი, 2018 (6 ღონისძიება)

პრემიერმინისტრმა - მამუკა ბახტაძემ ოლიმპიელებს უმასპინძლა

საქართველოს, მიუხედავად იმისა, რომ ჩვენი მოსახლეობა დიდი არ არის, ისტორიულად უნიკალური შედეგები აქვს სპორტში, რაც იმას ნიშნავს, რომ საქართველო ჩემპიონების სამშობლოა, - ამ სიტყვებით მიმართა საქართველოს პრემიერ-მინისტრმა მამუკა ბახტაძემ ქართველ ოლიმპიელებს, რომლებსაც მთავრობის ადმინისტრაციაში უმასპინძლა.

საღამოს საქართველოს სათხილამურო ფედერაციის პრეზიდენტი - ზურაბ კოსტავა, საქართველოს სამთო-სათხილამურო ნაკრების მწვრთნელი - ვალტერ ჰუბმანი, ოლიმპიელები: სოფიო ახმეტელი, ალექსი ბენიაიძე და რობერტ მახარაშვილი ესწრებოდნენ.

      

„თითოეული თქვენგანი საქართველოს გმირია. თქვენი შრომა ნათელი დასტურია იმისა, რომ თუ ადამიანი მოინდომებს, შედეგს აუცილებლად მიაღწევს. ეს არის ჩვენი, ქართველების ძალიან მნიშვნელოვანი ხასიათი და თქვენ ამის საუკეთესო მაგალითი ხართ. მინდა, თითოეულ თქვენგანს განსაკუთრებული მადლობა გადავუხადო. ჩვენ, მედლების რაოდენობით მსოფლიოს საუკეთესო 30 ქვეყანაში შევდივართ. ეს მართლაც უნიკალური მოვლენაა და ამ ყველაფერს კიდევ უფრო განმტკიცება და გაძლიერება სჭირდება",- მიმართა პრემიერ-მინისტრმა ოლიმპიელებს.

პრემიერის თქმით, სპორტი იქნება ყველაზე დიდი პრიორიტეტი, რომლის განვითარებას მთავრობა დიდ ყურადღებას დაუთმობს. 
„ახალი სამთავრობო პროგრამის წარდგენისას ჩვენ ვთქვით, რომ მაქსიმალურ პრიორიტეტს მივანიჭებთ განათლებას და განათლება ვერასოდეს იქნება წარმატებული, თუ მას არ ახლავს სპორტული კომპონენტი. მე სპორტსმენი ვიყავი და ძალიან კარგად ვიცი, რა მნიშვნელობა აქვს სპორტს იმისთვის, რომ ადამიანს ჩამოუყალიბდეს ის ფასეულობები, რომლებიც ძალიან მნიშვნელოვანია, რათა თითოეულმა ჩვენგანმა შექმნას ძლიერი და წარმატებული საქართველო", - განაცხადა მამუკა ბახტაძემ.

ღონისძიებას, ქართველ ოლიმპიელებთან ერთად, ევროპის ოლიმპიური კომიტეტების ვიცე-პრეზიდენტი ნილს ნიგაარდი, საქართველოს კულტურისა და სპორტის მინისტრი მიხეილ გიორგაძე და საქართველოს ეროვნული ოლიმპიური კომიტეტის პრეზიდენტი ლერი ხაბელოვი ესწრებოდნენ. ევროპის ოლიმპიური კომიტეტების ვიცე-პრეზიდენტმა მამუკა ბახტაძეს პრემიერ-მინისტრის თანამდებობაზე დანიშვნა მიულოცა. ნილს ნიგაარდის შეფასებით, ძალიან მნიშვნელოვანია, რომ ისეთ შესანიშნავ სპორტულ ქვეყანას, როგორიც საქართველოა, ასეთი ახალგაზრდა და სპორტული სულისკვეთების მქონე პრემიერ-მინისტრი ჰყავს.

 

სრულად 25 ივნ

23 ივნისს თბილისში ოლიმპიელთა ფორუმი გაიმართა

23 ივნისს ოლიმპიური დღე დილიდან კუს ტბაზე ოლიმპიური გარბენით დაიწყო. საქართველოს ოლიმპიური კომიტეტის ორგანიზებით სხვადასხვა სპორტის ფედერაციებმა, მათ შორის სათხილამურო ფედერაციამაც თავიანთი კუთხეები მოაწყვეს. 

                                                                       

საღამოს რუსთაველის თეატრში ოლიმპიელთა ფორუმი გაიმართა. ფორუმზე მოწვეულნი იყვნენ ოლიმპიური თამაშების ჩემპიონები და პრიზიორები, სხვადასხვა თაობის ოლიმპიელები, მათი ოჯახის წევრები.

საპატიო სტუმრის სტატუსით ფორუმს დაესწრნენ საერთაშორისო ოლიმპიური ორგანიზაციების ხელმძღვანელები.

ფორუმს ასევე ესწრებოდნენ კულტურისა და სპორტის მინისტრი მიხეილ გიორგაძე,  ქალაქ თბილისის მერი კახი კალაძე, თბილისის საკრებულოს თავმჯდომარე გიორგი ტყემალაძე, პარლამენტის წევრები, ვეტერანი და ახალგაზრდა სპორტსმენები, მოსწავლეები და სტუდენტები, მეცნიერებისა და კულტურის მოღვაწენი, სპორტის გულშემატკივრები.

1952-2018 წლებში, საბჭოთა ეპოქასა და დამოუკიდებლობის პერიოდში, ზაფხულისა და ზამთრის 27 ოლიმპიურ თამაშებში საქართველოს ჰყავდა 395 ოლიმპიელი.

ჩვენს ოლიმპიელებს სპორტის 21 სახეობაში სულ მოპოვებული აქვთ 126 ოლიმპიური მედალი, მათ შორის - 39 ოქროს მედალი.

საქართველო ამაყობს თავისი სახელოვანი სპორტსმენებით, თითოეული ჩვენი ოლიმპიელით. სწორედ მათთვის პატივის მისაგებად და ჩვენი სპორტის ოლიმპიური მიღწევების წარმოსაჩენად გაიმართა სრულიად საქართველოს ოლიმპიელთა ფორუმი.

ფორუმი მაღალ შინაარსობრივ და მხატვრულ დონეზე წარმოადგინა რუსთაველის თეატრის პროფესიონალთა  ჯგუფმა.

რუსთაველის თეატრში შეკრებილ საზოგადებას მიესალმა საქართველოს ეროვნული ოლიმპიური კომიტეტის პრეზიდენტი ლერი ხაბელოვი.

ფორუმის მონაწილეებმა პატივი მიაგეს გარდაცვლილ ოლიმპიელთა ხსოვნას, გაიხსენეს საინტერესო ისტორიები მათი სპორტული ბიოგრაფიიდან.

ფორუმზე მიიღეს დეკლარაცია, რომლის ტექსტიც წაიკითხა საქართველოს ოლიმპიელთა ასოციაციის პრეზიდენტმა, ორგზის ოლიმპიურმა პრიზიორმა და ორგზის მსოფლიოს ჩემპიონმა ლუკა კურტანიძემ.

ფორუმის თითოეულ მონაწილეს, მათ შორის სათხილამურო სპორტის ოლიმპიელებს: სოფიო ახმეტელს, ნინო წიკლაურს, კობა წაქაძეს, ლევან აბრამიშვილს, ზურაბ ჯიჯიშვილს, კახა წაქაძეს, რობერტ მახარაშვილს, იასონ აბრამაშვილს, ჯაბა გელაშვილს და ალექსი ბენიაიძეს სეოკ-ის სპეციალური საჩუქარი - თასები და  ამ დღისთვის გამოცემული კრებული - „საქართველოს ოლიმპიელები" გადაეცათ.

ბოლოს, ფორუმის მონაწილეთა პატივსაცემად,  საქართველოს ეროვნული ოლიმპიური კომიტეტის სახელით გაიმართა გალა-მიღება.

 

 

სრულად 25 ივნ

ნინო წიკლაური საფრანგეთში ვარჯიშობს

საქართველოს სამთო-მოთხილამურეთა ნაკრების წევრი - ნინო წიკლაური საფრანგეთში იმყოფება. ლეს დუ ალპსის მყინვარზე ნინო 5 ივლისამდე ივარჯიშებს.

,,სასწაული თოვლია, ამინდიც ხელს გვიწყობს და ამ ყველაფერს მაქსიმალურად ვიყენებთ, რომ კარგად ვივარჯიშოთ. ივლისში ფიზიკურად მოვემზადებით და აგვისტოში ისევ თოვლს დავუბრუნდებით.“ - ნინო წიკლაური.

წარმატებულ ვარჯიშს ვუსურვებთ ნინოს!

სრულად 19 ივნ

ქართველი მოთხილამურეები ავსტრიაში გაემგზავრნენ

17 ივნისს საქართველოს სამთო-მოთხილამურეთა ბავშვთა ნაკრების წევრები: მარიამ ნავერიანი, ნოდარ კოზანაშვილი, კონსტანტინე გოცირიძე, ირაკლი არღვლიანი, მიხეილ ჩართოლანი, ლუკა ბუჩუკური, სამთო-მოთხილამურეთა ახალგაზრდული ნაკრების წევრი - სანდრო ჟორჟოლიანი, საქართველოს ფრისტაილის ნაკრების წევრები: დავით თედიაშვილი, ბექა ბერძენიშვილი, მწრთვნელი - იასონ აბრამაშვილი და ფედერაციის წარმომადგენელი ნინო ნინუა ავსტრიაში გაემგზავრნენ.

ისინი ჰინტერტუქსის მყინვარზე ორი კვირის განმავლობაში ივარჯიშებენ.

ჩვენს სპორტსმენებს წარმატებულ ვარჯიშს ვუსურვებთ!

სრულად 18 ივნ

ინტერვიუ საქართველოს სამთო-სათხილამურო ნაკრების მწვრთნელთან - ვალტერ ჰუბმანთან

  1. როგორ შეაფასებდით განვლილ ოლიმპიურ სეზონს?

საქართველოს ნაკრებთან შარშან დავიწყე მუშაობა. მიუხედავად იმისა, რომ მომავალი სეზონისთვის ფიზიკური მომზადება ცოტა დაგვაგვინდა, მაინც კმაყოფილი ვარ. წელს ყველაფერი დროულად დავიწყეთ.

  1. 2018-19 წლის სეზონისთვის მზადება უკვე დაიწყეთ?

პირველი სავარჯიშო შეკრება ბაკურიანში ახლა დასრულდა. ფიზიკური მომზადება ძალიან მნიშვნელოვანია. ბაკურიანი არაჩვეულებრივი კურორტია. საქართველოს ასეთი კარგი ადგილი, რატომ არ უნდა გამოვიყენოთ სავარჯიშოდ?!

  1. შემდეგ სავარჯიშო შეკრებას სად გეგმავთ, ისევ ბაკურიანში ხომ არა?

ამას მოგვიანებით გადავწყვეტთ. შესაძლოა ზღვის მხარეს გავემგზავროთ, რადგან დიდი ფიზიკური დატვირთვის შემდეგ ზღვა ძალიან კარგია ძალების აღდგენისთვის. ახლა სპორტსმენები სახლში არიან, მათ მივეცი სპეციალური პროგრამა, რის მიხედვითაც ივარჯიშებენ. ორ კვირაში საქართველოში დავბრუნდები, რომ შემდეგ შეკრებაზე წავიდეთ.

  1. თქვენი შთაბეჭდილებები ბაკურიანთან დაკავშირებით

ბაკურიანი კარგ სიმაღლეზე მდებარეობს. ზღვის დონიდან ასეთ სიმაღლეზე ვარჯიში კარგ ეფექტს იძლევა. ბაკურიანი მშვენიერი ადგილია სავარჯიშოდ: მთაზე სიარული, სირბილი და სხვადასხვა ვარჯიშები. ასევე ვნახე სათხილამურო ტრასებიც, ძალიან მომეწონა და შესაძლოა სავარჯიშოდ ზაამთარშიც ჩამოვიდეთ. საინტერესო ადგილია.

  1. 2019 წელს არეში მსოფლიო ჩემპიონატზე რამდენი სპორტსმენის წაყვანას ფიქრობთ და რა არის თქვენი მიზანი?

ვფიქრობ, რომ მსოფლიო ჩემპიონატზე ოთხი ქართველი სპორტსმენი გაემგზავრება. ჩვენ მომავალი სეზონისთვის ვემზადებით როგორც მსოფლიო ჩემპიონატისთვის, ასევე სხვა შეჯიბრებებისთვისაც. ჩვენი მთავარი მიზანი FIS-ის ქულების გაუმჯობესებაა.

  1. ჩვენ 2023 წლის სათხილამურო და სნოუბორდის ფრისტაილის მსოფლიო ჩემპიონატის ჩატარების უფლება მოვიპოვეთ, რას ფიქრობთ ამის შესახებ?

ეს ამბავი რომ გავიგე,გამიხარდა. საქართველოსთვის ეს დიდი გამოცდილება იქნება. მსოფლიო თქვენს ქვეყანას უკეთ გაიცნობს. სამთო-კურორტები ცნობილი გახდება. ეს ქვეყნისთვისკარგია.

  1. როგორ ფიქრობთ ეს მოვლენა მომავალში ხელს შეუწყობს იმას, რომ საქართველოში სამთო-თხილამურებშიც ჩავატაროთ დიდი შეჯიბრებები?

რა თქმა უნდა. მსოფლიო ჩემპიონატის ჩატარება, მომავალში ხელს შეუწყობს იმას, რომ სამთო-თხილამურებშიც ჩაატაროთ დიდი შეჯიბრებები. საქართველოში განვითარდება ზამთრის სპორტის სხვსდასხვა სახეობა და ახალგაზრდების მოტივაციისთვისაც ძალიან კარგია.

      დიდი მადლობა, წარმატებებს გისურვებთ!

      დიდი მადლობა.

 

 

 

 

სრულად 12 ივნ

როზი მიტერმაიერი და კრისტიან ნოიროიტერი სტუმრად საქართველოში

მთის კურორტების განვითარების კომპანიისა და საქართველოს სათხილამურო ფედერაციის მხარდაჭერით ხუთი დღის განმავლობაში საქართველოში სტუმრად იმყოფებოდნენ სამთო-სათხილამურო სპორტის ლეგენდები - მსოფლიო და ოლიმპიური ჩემპიონი როზი მიტერმაიერი, მსოფლიო თასის მრავალი ეტაპის გამარჯვებული კრისტიან ნოიროიტერი და სამთო-სათხილამურო შეჯიბრებების მოწყობის სპეციალისტი - შტეფან ბერტში. გერმანელი ცოლ-ქმარი ამჟამინდელი წარმატებული სპორტსმენის, სლალომის სპეციალისტის - ფელიქს ნოიროიტერის მშობლები არიან.

როზიმ და კრისტაიანმა დაათვალიერეს საქართველოს სათხილამურო კურორტები, ისინი აღფრთოვანდნენ საქართველოს მთებით. მათ დახმარება აღგვითქვეს, რომ მომავალში საქართველოში სათხილამურო სპორტის განვითარებას ხელს შეუწყობენ. საუბარი იყო იმის შესახებ, რომ ბაკურიანში სათხილამურო სკოლა გაიხსნას.

როზი მიტერმაიერისა და კრისტიან ნოიროიტერის სტუმრობა საქართველოში იმდენად მნიშვნელოვანი იყო, რომ ვიზიტის ბოლო დღეს ისინი პრემიერ მინისტრმა - გიორგი კვირიკაშვილმა მიიღო. 

                                        

 

სრულად 1 ივნ
მაისი, 2018 (4 ღონისძიება)

საქართველოს სათხილამურო ფედერაციის გენერალური სპონსორის კომპანია ,,სილქნეტის“ დამფუძნებლის გიორგი რამიშვილის განცხადება 2023 წლის სათხილამურო და სნოუბორდის ფრისტაილის მსოფლიო ჩემპიონატის შესახებ

საბერძნეთში, კოსტა ნავარინოს კურორტზე, მაისში ჩატარებულ მსოფლიო სათხილამურო ფედერაციის რიგით 51-ე კონგრესზე, კენჭისყრის მონაწილეების ერთსულოვანი გადაწყვეტილებით საქართველოს მიენიჭა 2023 წლის სათხილამურო და სნოუბორდის ფრისტაილის მსოფლიო ჩემპიონატების მასპინძელი ქვეყნის სტატუსი.

საქართველოს სათხილამურო ფედერაციის ყოფილი პრეზიდენტის, კომპანია სილქ როუდ ჯგუფის დამფუძნებლის, გიორგი რამიშვილის, თქმით, ფედერაციის და მისი სპონსორების - სილქ როუდ ჯგუფის (წინა 10 წლის) და სილქნეტის (უკანასკნელი 10 წლის განმავლობაში) -  მრავალწლიანი შრომა დაფასდა: 

„მივაღწიეთ იმას, რომ საქართველო მიიღეს ზამთრის სპორტის მსოფლიო ჩემპიონატების ორგანიზატორი ქვეყნების საერთაშორისო ოჯახში. საქართველოს სათხილამურო ფედერაცია თავისის გენერალური სპონსორის, კომპანია სილქნეტის, დახმარებით დიდი ხანია მუშაობს ამ მიმართულებით. თუმცა, ჩვენმა ძალისხმევამ წარმატებული შედეგი მას მერე გამოიღო, რაც საქართველოს პრემიერ-მინისტრი ბატონი გიორგი კვირიკაშვილი პირადად ჩაერთო  ამ საქმეში. სენტ მორიცში სათხილამურო ფედერაციის პრეზიდენტთან, ბატონ ჯან ფრანკო კასპერთან, შეხვედრის დროს მან დაადასტურა საქართველოს მთავრობის სურვილი და მზადყოფნა იმ დიდი სამუშაოს ჩასატარებლად,  რაც ასეთი მასშტაბის და პრესტიჟის სპორტული ფორუმისთვისაა საჭირო. ბატონმა პრემიერმა მაშინ განაცხადა: „ჩათვალეთ, რომ მე პირადად ვიქნები ამ პროექტის მენეჯერი“. მისი მხრიდან ამ ინიციატივის მიმართ მაღალი ხარისხის ერთგულება და საქართველოში ზამთრის სპორტის განვითარების უპრეცედენტო მხარდაჭერა საერთაშორისო ფედერაციის ხელმძღვანელობამ ნათლად დაინახა.

ჩვენ გვჯერა, რომ ყველა მონაწილე მხარის ძალისხმევით ღირსეულად მოვემზადებით და წარმატებით ჩავატარებთ მსოფლიო ჩემპიონატებს. ნამდვილი საქმე ახლა იწყება.

და ბოლოს, მინდა ყველას მოგილოცოთ საქართველოს დამოუკიდებლობის დღის 100 წლისთავი.“

 

 

სრულად 28 მაისი

ქართველი სამთო-მოთხილამურეები ზამთრის სეზონისთვის ემზადებიან

საქართველოს სამთო-მოთხილამურეთა ნაკრები გუნდის წევრები: იასონ აბრამაშვილი, ალექსი ბენიაიძე და ახალგაზრდული ნაკრების წევრები: ბესარიონ ჯაფარიძე, სანდრო ჟორჟოლიანი და ნოდარ კოზანაშვილი ბაკურიანში იმყოფებიან სავარჯიშო შეკრებაზე. მათ მალე სოსო ჯაფარიძეც შეურთდება.

ისინი ნაკრების მწვრთნელის - ვალტერ ჰუბმანის და მისი ასისტენტის ვახტანგ თედიაშვილის მეთვალყურეობის ქვეშ  ერთი კვირის განმავლობაში ფიზიკურად ივარჯიშებენ. ჩვენი სპორტსმენები გამძლეობაზე, სისწრაფეზე და კორდინაციაზე იმუშავებენ.

წარმატებულ ვარჯიშს ვუსურვებთ მათ!

სრულად 25 მაისი

საქართველო სათხილამურო და სნოუბორდის ფრისტაილის მსოფლიო ჩემპიონატს უმასპინძლებს

საქართველო სათხილამურო და სნოუბორდის ფრისტაილის მსოფლიო ჩემპიონატს უმასპინძლებს.

ამის შესახებ რამდენიმე წუთის წინ ოფიციალურად გახდა ცნობილი საბერძნეთში საერთაშორისო სათხილამურო ფედერაციის კონგრესზე გამართულ კენჭისყრაზე.

ბაკურიანში მსოფლიო ჩემპიონატის ჩატარების თაობაზე განაცხადი ქართულმა მხარემ 2017 წელს გააკეთა. დღევანდელი გადაწყვეტილება საქართველოს მთავრობის, საქართველოს სათხილამურო ფედერაციისა და საქართველოს მთის კურორტების განვითარების კომპანიის ერთობლივი ძალისხმევისა და რამდენიმეწლიანი შრომის შედეგია.

მსოფლიო ჩემპიონატი საქართველოში 2023 წელს გაიმართება.

                                    

სრულად 17 მაისი

დღეს საქართველოს სათხილამურო ფედერაცია FIS-ის საბჭოს წინაშე პრეზენტაციით წარსდგა

დღეს კოსტა ნავარინოში, საბერძნეთში საერთაშორისო სათხილამურო ფედერაციის FIS-ის კონგრესზე, საქართველოს სათხილამურო ფედერაცია FIS-ის საბჭოს წინაშე ბაკურიანი 2023 წლის სათხილამურო და სნოუბორდის ფრისტაილის მსოფლიო ჩემპიონატის პრეზენტაციით წარსდგა.

სიტყვით გამოვიდნენ საქართველოს სათხილამურო ფედერაციის პრეზიდენტი ზურაბ კოსტავა, საქართველოს მთის კურორტების განვითარების კომპანიის დირექტორი ალექსანდრე ონოფრიშვილი და ფრისტაილის კომიტეტის უფროსი ლევან მეტრეველი.

17 მაისს კონგრესზე ოფიციალურად დასახელდება 2023 წლის სათხილამურო და სნოუბორდის ფრისტაილის მსოფლიო ჩემპიონატის ჩატარების გამარჯვებული კანდიდატის ვინაობა.    

 

სრულად 15 მაისი